اولا بيرد مان كان لازم يكسب, بصراحة فيلم يستاهل اخراج وسيناريو وحبكة وتصوير واداء, فيلم مافيهوش غلطة, مقارنة بباقي افلام السنة.
الاوسكارز النهاردة في المٌجمل كان مٌمل, مش زي السنة اللي فاتت, ايلين دي جينيرس كانت ملاك واضافت روح من البهجة على الناس الموجودين في الصالة وعلى المشاهدين في بيوتهم, روحها كانت طاغية, بجانب انها مرحة ودمها خفيف مفيش بعد كدا.
نيل باتريك كان اومليت اوي, يعني مفيش حاجة اوريجينال عملها, غير انه قلع!
انا حسيت ان مفيش هوست السنادي, مجرد ناس طلعو قاللو اللي فل جواب ومشيو, يعني ماكنش في تفاعل او اي حاجة غير في لمحات بسيطة جدا جدا, ولما حاول باتريك يعمل فيها دمه خفيف مع بطل فيلم سيلما, فكست منه جامد.
خلينا نتكلم بشكل عام عن الجوايز كدا:
- ايدي ريدماين عن اداء ستيفن هوكينج, كان متميز و رائع ويستحق الجايزة عن جدارة رغم سنه, وشوف كان بينافس مين, بينديكيت ده مثلا عايز مهرجان لوحده, بس ايدي كان اداؤه فوق الوصف, برافو ايدي.
- جوليان مور, ادائها كان مؤثر جدا, الشت منها بعض طرق نطق الكلمات, يعني مثلا اللقطة الي كانت نزلت تدور على الموبايل في المطبخ و قلبت طفلة فجأة, ديالوج كويس, بس كان عايز يتصور تاني, لكن اداء متميز ورائع من جوليان بعد سنين من اداء ادوار ثانوية.
- فيلم ايدا او عايدة (اصل الاسم باللعربي), فيلم جميل جدا, نمط الافلام الاوربية اللي بالشكل ده بيكون مدروس ومحبوك على فترة قصيرة من الوقت, يعني انسى ان السينما الاوربية تعمل فيلم زي بوي هود, خالص, ممكن على اجزاء, زي هاري بوتر مثلا, المهم ان فيلم ايدا عجبني فيه البساطة, اداؤها وهي بتحاول تتحرر من القيود, فيلم مٌمتع.
- جي كي سيمسونس, عمل اداء عالمي, بس الفيلم مش اد كدا, يعني كان محتاج فيلم اكبر من ده يستوعب دوره وامكانياته, لكنه ابدع وكان دوره رائع ومٌبهم وغامض احيانا, شخصية مؤثرة وثبات على نمطية مختلفة عن البني ادمين الطبيعين, خلق كاريزما بمجرد ما بدأ الفيلم بكل بساطة وحزم.
- اغنية جلوري كويسة, بس اوفر اوي الشعب الافرواميركان, لسة عايشين في زمن العبث والتعصب العرقي.
- بيرد مان, لا تعليق, شابو.
- جراند بودابست اوتيل, لطيف, مختلف وسهل الهضم, مش مكلكع, مش عبيط, مش عميق, فيلم سطحي, لذيذ, سهل, واخراج العبقري ويس اندرسون, من غير كلام فيلم جميل.
- انا مش مندهش ان انترستيلر ماخدش احسن فيلم, اخراج او اي حاجة, ولا حتة مزيكا هانز زيمر, هو خد بس على المؤثرات البصرية, اللي هو رسالة, حلو الهلس دا يا كريستوفر.
في حاجة لازم اقولها عن مايكل كيتون, انا بحاول اتخيل حد تاني غيره, مين؟ هيو جاكمان؟ لا لا, طب ايد هاريس؟..لا بردو...طب روبرت داوني جي ار؟ همم..والله ممكن؟ بس مايكل كيتون كان ممتاز واداؤه كان ساحر ومنسجم جدا جدا جدا في الشخصية.
ويل دون, اتمنى اشوف ماثيو ماكونهي وكريستين بيل السنة الجاية لانهم المٌفضلين بالنسبالي في نوعية افلامهم على مدار السنة.
سلام.