اتفرجت على الجوكر وحبيت الفكرة وتطور الشخصية, وربط بشكل سهل وجوده في سلسلة باتمان الاخيرة و ومشهد ابو بروس وين وهو بـ يتقتل في الشارع في نفس الوقت اللي جوثام كلها اعترفت ان الجوكر هو رمز العشوائية والجنون.
انا هركز اكتر على تطور الشخصية, برضو الحبكة الدرامية كانت ممتازة و وصلت الفكرة ان التعب النفسي والعصبي لشخص كانت افكاره كلها حب وضحك و خير, الى اقصى درجة ممكنة من الشر والكره و البؤس.
توقعت ان الشخصية دي هتكون نهايتها مأساوية, هي فعلا كانت مأساوية, بس لسكان جوثام الاغنياء, وكانت رائعة له في شوارع جوثام, مع عدد كبير و هائل من المناصرين اللي عندهم اجزاء بسيطة من البؤس ايضا, لكن عمرها ما هتكون بنفس البؤس اللي عاشه آرثر (جوكر).
التحول الدرامي برضو والتطور, اللي بدأ ب انه كان بيتهان باستمرار في الشوارع واي مكان يروحو, مرة ورا التانية, لحد ما طلع الطبنجة ف وش الكل وابتدا يعرف اكتر هو مين (رغم كل المأساة والحياة اللي عايشها, يعني مجهود نفسي وعصبي غير طبيعي) عشان يعرف اجابة بسيطة, هو عايش ليه؟
الغريب في الموضوع ان فيلم ساعتين يقدر يعمل الحبكة دي ويطور الشخصية مع كل دقيقة ومع ذلك توصلك المصدقية بشكل صحيح بدون استعجال من القائمين على العمل؟! فعلا, جهد ممتاز و وش رايح على الاوسكار بطولة وقصة واخراج.
طبعا الفيلم دا رجعنا تاني لموضوع ان الواحد ممكن يتفرج على فيلم مائة مرة عادي مايزهقش, مثلا فيلم زي The Dark Knight الواحد ممكن لحد دلوقتي عادي يفتحو ويتفرج عليه, الكلام دا هيحصل مع فيلم Joker, الناس مش هتزهق منه.
